News Feature

Mbah Parjo, Piyantun Kakung Ingkang Remen Ngibadah

Parjo utawi Sapar asmanipun piyantun kakung ingkang sampun nggadahi yuswa 75 taun. Simbah kelairan Sleman, menika nggadahi setunggal garwa. Mbah Parjo setri menika jelukanipun. Mbah Parjo nggadahi gangsal putra, tiga setri lan kalih kakung. Sedaya putranipun menika nyambut damel wonten ing Jakarta. Pramila, mbah Parjo kakung kaliyan mbah Parjo setri mapan wonten Yogyakarta, inggih menika dhusun Balangan namung piyantun kalih.

 Samangsa enemipun, mbah Parjo piyantun ingkang gethol nyambut damel. Lajeng, palakrama kaliyan mbah Parjo setri damel piyantun kakung menika saya gethol anggenipun nyambut damel. Piyantun kalih menika sesarengan nyengkuyung dadosaken kulawarga ingkang ‘harmonis’, sanajan urip pas-pasan malah sajak kirang, ananging mbah Parjo kakung asring anggenipun ngresula.

Padamelan sadinten-dintenipun inggih menika nggarap saben saha mburuh. Saking asiling menika mbah Parjo saged nyekolahaken gangsal putranipun ngantos tamat SMEA. Sanajan, dipunrencangi ngantos sedaya putranipun mentas saha nyambut damel wonten Jakarta. Ngantos samenika, mbah Parjo kakung kaliyan garwanipun mapan ing dhusun Balangan namun piyantun kalih.

Mbah Parjo menika piyantun ingkang remen nyengkuyung wonten ing dhusun, piyantun ingkang remen tetulung marang tiyang sanes. Ugi nggadahi sipat sumeh. Samangsa uripiun, mbah Parjo kakung menika getol anggenipun ngibadah. Sesarengan kaliyan garwanipun, mbah Parjo setri tindak dating mesjid utawi mushola. Sanajan urip ngrekasa, ananging mbah Parjo boten kesupen marang Gusti Ingkang Paring Panguripan.

Mbah Parjo kakung, piyantun kang asring gerah. Ing yuswa 75 taun taksih remen nyambut damel, boten purun namung lenggahan sanajan uripipun sampun kepenak. Semana uga kaliyan mbah Parjo setri, kekalihipun remen tulung tinulung. Ing dinten Jumat, 28 September 2013, mbah Parjo kakung lan garwanipun tindak dateng mushola badhe nindakaken sholat magrib. Mbah Parjo kakung dinten menika kayata piyantun ingkang nembe gerah. Anggenipun mlampah tumuju mushola suku satunggalipun ingkang tengen dipunseret, amargi jahaw ing dinten saderengipun.

 Sholat magrib dinten menika dados sholat jamaah pungkasan kangge piyantun kakung kang yuswanipun 75 taun menika. Sesampunipun, sholat magrib, mbah Parjo kakung lajeng jawah. Kaliyan jamaah sanesipun mbah Parjo kakung dipunbeta wangsul saha dipuntimbalaken Dokter menyang dalemipun mbah Parjo. Tangga teparuhipun sami nyedak, rumangsa kawatir dening mbah Parjo.

Setu sontenipun, mbah Parjo kang raosipun sampun luwih kepenak, lajeng nulungi garwanipun ingkang nembe nyapu, inggih menika mbakar uwuh. Ananging, dalunipun mbah Parjo raosipun boten sae, piyantun kakung menika muntah-muntah. Lajeng, wanci kalih enjang tanggal 29 September 2013, piyantun kakung kang remen ngibadah menika dipunpundhut dening Gusti Allah kayata tiyang ingkang nembe sare.

Tengga teparuh saha sederek sesarengan tindak dateng dalemipun mbah Parjo. Kathah tangga taksih boten percaya menawi piyantun kakung ingkang remen tetulung saha gethol anggenipun ngibadah menika sampun sedha. Lajeng, putra-putranipun dipunkabari menawi Bapakipun sampun boten wonten. Ing dinten Minggu, 29 September 2013 menika, mbah Parjo kakung dipunsarekaken ing sasonoloyo dhusun Balangan. Kita sedaya namung saged ndonga mugi sukmanipun saged katampi ing sisihipun Gusti Allah, kanthi ‘khusnul khotimah.’ 

Feature

Trunyan, Papan Wisata Kang Unik

Rombongan tiga bis mahasiswa saking Universitas Negeri Yogyakarta (UNY), dumugi wonten salah satunggaling papan wisata ing Bali kang sampun misuwur inggih punika wonten ing dhusun Trunyan, Kecamatan Kintamani. Rombongan mahasiswa menika nggadahi ancas badhe wonten ing sasonoloyanipun dhusun Trunyan. Trunyan menika asalipun saking tembung “taru” wit saha “menyan” arum disebat mekaten amargi ing mriku wonten wit kang ageng sanget naminipun uwit Taru menyan. Uwit menika diambali mekaten amargi nggadahi ganda arum kayata menyan.

Sasonoloyo dhusun Trunyan menika boten dados setunggal kaliyan dhusunipun. Pramila menawi badhe ngunjungi sasonoloyanipun utawi dhusun Trunyanipun kedah nyebrang danau Batur rumiyen mila wonten mrika dipunsediakaken transportasi arupa prau motor. Saking dhusun Kadisan nyebrang danau Batur tumuju ing sasonoloyo dhusun Trunyan kita saged mersani endahing alam kang ngremenaken manah, inggih punika endahing danau Batur kang dipunubengi kaliyan Gunung Batur ingkang nggadahi hawa sejuk.

Kirang luwih tigang dasa menit nyebrang danau kanthi ginakaken prau motor saking desa Kadisan ngantos dumugi sasonoloyo dhusun Trunyan. Sasonoloyo Trunyan menika kabagi dados tiga papan ingkang beda-beda inggih punika sasonoloyo kangge tiyang ingkang pejahipun sae, sasonoloyo kangge lare-lare, saha sasonoloyo kangge tiyang ingkang pejahipun amargi cacat, kayata amargi kacilakan, bunuh diri, dipunpejahi. Ananging menika rombongan namung tumuju ing sasonoloyo tiyang ingkang pejahipun kanthi sae. Sae menika dipunsebat kangge tiyang ingkang pejahipun amargi gerah, sakit sepuh.

Dumugi ing sasonoloyo Trunyan, papanipun kayata utan, kathah uwit-uwit ageng sanget. Wit Tarumenyan menika ingkang nggadahi ukuran langkung ageng. Ing ngajengipun sasonoloyo wonten kalih gapura, kang sedaya gapura wau wonten ubarampenipun piyambak-piyambak. Mlebet sasonoloyonipun, hawanipun lajeng beda, wit Taru menyan ingkang njulang ageng menika sesandingan kaliyan papan utawi altar kangge nata tengkorak-tengkorak saking mayit.

Kaunikan saking sasonoloyo dhusun Trunyan dipuntandingaken kaliyan sasonoloyo sanesipun inggih menika bab tiyang ingkang pejah wau anggenipun ngubur boten dipunpendhem ananging dipunselehaken menika kemawon. Ing ngriku tengkorak saha balung-balung mayit menika kasebar pating tlecek boten kaurus, boten namung balung kemawon ananging ugi sedaya ubarampe kayata duwit, sandal, sandang, lsp. Gumunipun mayit-mayit wau boten mambu, amargi ambunipun saking mayit dipunserep kaliyan wit Taru menyanipun. Kaunikan sanesipun mayit-mayit wonten mrika jumlahipun sewelas, boten angsal kirang punapa luwih. Tradisi maringaken mayit wonten ing nduwur siti punika kaliyan masyarakat dhusun Trunyan dipunsebat Mapesah.

                                                                             Foto: Dokumentasi pribadi

Straight News

Kapundhut Gusti Allah kayata Tiyang Ingkang Sare

      Yogyakarta, Kapundhut Gusti Allah kayata tiyang ingkang nembe sare. Dinten menika, tanggal 29 September 2013, wanci kalih enjang ing dhusun Balangan geger. mbah Parjo kakung utawi Sapar asma wetanipun ing dinten menika kapundhut wonten Ngarsanipun Gusti Allah. Warga dhusun Balangan kathah ingkang dereng percaya menawi mbah Parjo sedha.

   Ing dinten Setu, simbah kang yuswanipun 75 taun menika taksih tindak dateng mushola kangge sholat magrib. Bibar sholat, simbah Parjo lajeng ngambruk amargi sampun boten kiat. Kaliyan jamaah sanesipun, lajeng mbah Parjo dipunbeta wangsul saha dipunundangaken Dokter. Ananging, ngepasi wekdal kalih enjang, mbah Parjo sampun dipunpundhut Ingkang Maha Kuaos, alih-alih ngraosaken sakit, mbah Parjo dipunpundhut kayata tiyang ingkang nembe sare. Mugi-mugi sukmanipun saged khusnul khotimah. Amin.